خلع دیگر مالی عقود  کی طرح ایک مالی عقد ہے جو فریقین(میاں بیوی)  کی رضامندی سے تام ہوتا ہے اور اگر فریقین میں سے کوئی ایک بھی راضی نہ ہو تو خلع درست نہیں ہوتا  اور جہاں تک مروّجہ عدالتی خلع کا حکم ہے تو اس کو عام طور پر خلع کہا جاتا ہے لیکن وہ درحقیقت فسخ ِ نکاح ہوتا ہے اور شریعتِ مطہرہ کی تعلیمات کے مطابق قاضی کو تنسیخ نکاح کا اختیار صرف اس صورت میں حاصل ہوتا ہے کہ یا تو  شوہر اپنی بیوی  کو ظلماً ناقابل برداشت مارتا پیٹتا ہو،یا اس کا شوہرمتعنت ہو یعنی  باوجود قدرت کےبیوی کو نان و نفقہ نہ دیتا ہواور بیوی نے بھی اسی تعنّت کو بنیاد بناکر کیس دائر کیا ہو بصورت دیگر عدالتی خلع شرعا معتبر نہیں۔
بصورت مسؤلہ اگر سوال میں مذکورہ تفصیل واقعی درست ہے اور آپ کی طرف سے تعنّت  نہیں اور آپ کی بیوی نے واقعی محض اس بنیاد پر خلع کا کیس دائر کیا ہے کہ و ہ آپ سے نفرت کرتی ہے اور آپ کے ساتھ رہنا نہیں چاہتی تو اس صورت میں عدالت نے جو خلع کی ڈگری جاری کی ہے شریعت میں اس ڈگری کا کوئی اعتبار نہیں ہے اور آپ کی بیوی آپ کی نکاح سے نہیں نکلی بلکہ وہ  بدستور آپ کی نکاح میں ہے اور وہ کسی دوسری جگہ نکاح کرنے کے سلسلے میں ابھی تک آزاد نہیں لہذا اگروہ  آپ سے طلاق یا خلع لئے بغیر دوسرا نکاح کرے گی تو یہ شرعا ً ناجائز اور حرام ہوگا اور اس طرح کرنے سے وہ پوری زندگی حرام کاری میں ملوث رہے گی۔
خلع میں چونکہ بیوی کی طرف سے خاوند کو کسی مال کی پیشکش ہوتی ہے کہ وہ اس مال کے بدلہ میں بیوی کو چھوڑ دے اس لئے اگر آپ کی بیوی آپ کو خلع کے طور پر مذکورہ پلاٹ کی پیشکش  کرتی ہے اور آپ اس پر راضی ہو یا اس کی طرف سے کوئی اور پیشکش ہو جس پر آپ راضی  ہو تو اس صورت میں خلع درست ہوگا۔
في الدر المختار وحاشية ابن عابدين:
(قَوْلُهُ: وَشَرْطُهُ كَالطَّلَاقِ)... وَأَمَّا رُكْنُهُ فَهُوَ كَمَا فِي الْبَدَائِعِ: إذَا كَانَ بِعِوَضٍ الْإِيجَابُ وَالْقَبُولُ لِأَنَّهُ عَقْدٌ عَلَى الطَّلَاقِ بِعِوَضٍ، فَلَا تَقَعُ الْفُرْقَةُ، وَلَا يُسْتَحَقُّ الْعِوَضُ بِدُونِ الْقَبُولِ...الخ
(كتاب الطلاق ، باب الخلع ، 3/ 441 ، دار الفكر)
و في الفتاوي الهندية:
الخلع إزالة ملك النكاح ببدل بلفظ الخلع كذا في فتح القدير وقد يصح بلفظ البيع والشراء
 وقد يكون بالفارسية كذا في الظهيرية(وشرطه) شرط الطلاق(وحكمه) وقوع الطلاق البائن كذا في التبيين.
(كتاب الطلاق ، الباب الثامن في الخلع ، 1/ 488 ، دار الفكر)
الحیلہ الناجزہ میں ہے:
جس عورت كا شوہر بیوی کے حقوق سے لاپرواہ ہواس کے شرعی حقوق نان و نفقہ ادا نہ کرتا ہو اس عورت کو ضروری ہے کہ وہ ایسے شوہر سے خلع حاصل کرے لیکن اگر کافی اور حتی الامکان کوشش کے باوجود کوئی صورت نہ بن سکے تو سخت مجبوری کی حالت میں مذہب مالکیہ پر عمل کرنے کی گنجائش ہے کیونکہ ان کے نزدیک زوجہ متعنت(یعنی مذکورہ بالا قسم کے شوہر سے )کو تفریق کا حق مل سکتا ہے۔
(مظلوم خواتین کی مشکلات کا شرعی حل ، ص293 ، ج 1 ، مکتبہ رضی دیوبند)

Mufti

تاریخ جواب: 14 Mar 2026

تاریخ اشاعت: 15 Jun 2026

واللہ اعلم بالصواب