وعليكم السلام ورحمۃ الله وبركاتہ!
واضح رہے کہ   عورت کےحیض کے ایام کم سے کم تین دن تین راتیں ہیں،اور زیادہ سے زیادہ دس دن اوردس راتیں ہیں،اگر کسی عورت کی عادت معلوم ہو،اوروہ اپنی عادت کے مطابق پاک ہوجائے،لیکن دس  دن گزرنے سے پہلے دوبارہ خون آجائے،تو پھر اس میں تفصیل یہ ہے کہ اگر خون دسویں دن سے پہلے یا دسویں دن پر رک گیا،تو عورت کی عادت تبدیل ہوگئی ہے،اور اگردسویں دن کے بعد بھی جاری رہا تو پھر عورت کی اپنی سابقہ عادت برقرار ہے،اور یہ اضافی دنوں میں آنے والا خون استحاضہ ہے،لہذا اس میں چھوڑی گئی تمام نمازوں اور روزوں کا اعادہ ضروری ہوگا۔
بصورت مسئولہ آپ کو28 فروری کو آنے والاخون حیض کا خون ہے،پھر یہ چونکہ آپ کی سابقہ عادت جو کہ سات دن کی تھی،سے بڑھ کر نویں دن د وبارہ خون آیا ہے،اب اگر خون دسویں (10) دن کےبعد بھی جاری رہا ہو،تو پھر آپ کی اپنی سابقہ عادت برقرار ہے یعنی اٹھائیس ( 28 )تاریخ سے لے کرپانچ (5)تاریخ تک،اور ان دنوں میں جو نمازیں پڑھیں ہیں،چونکہ لاعلمی میں پڑھیں  ہیں ،اس لیے اس پر ان شاء اللہ اجر ملے گا۔تاہم  اس صورت میں  جمعرات(جو نواں دن ہے خون آنے کےبعد) اورجمعہ(جو دسواں دن ہے خون آنے کے بعد) کی چھوڑی ہوئیں نمازوں کی قضاء ضروری ہے،کیونکہ یہ استحاضہ کا خون تھا،نہ کہ حیض کا۔اور  اگر خون دسویں دن بند ہوا ہے،تو پھر آپ کی عادت تبدیل ہوگئی ہے ،لہذا ان  پورےدس دن یعنی اٹھائیس(28)سے لےکرآٹھ(8) تاریخ تک جو نمازیں ادا کی گئی  ہیں،چونکہ لا علمی میں ادا کی گئی ہیں،اس لئے ان پر ان شاء اللہ اجر ملے گا۔
نوٹ:-آپ کی آسانی کےلئے ایک ضابطہ لکھا جاتا ہے آپ  اس میں غور کرکےخود معلوم کرسکتی ہیں،کہ اب میرا حیض کا زمانہ ہے یا طہر کا۔وہ یہ کہ جب خون رک جانے کے بعد طہرکےمکمل پندرہ(15) دن گزر جائیں،اور اس کے بعد خون آنا شروع ہوجائے،توآپ اس کو حیض کا خون ہی شمار کیا کریں،پھر اگرخون  آپ کی عادت سے پہلے بند ہوجائے،تو جس دن بند ہوجائے،اس وقت کی نماز کو آخری وقت تک موخرکریں،اگر آخری وقت میں بھی خون نہیں آیا تو غسل کرکے احتیاطا نماز پڑھ لیا کریں ،اور اگر رمضان ہے،تو روزے رکھنا بھی شروع کریں۔پھر اگر اپنی سابقہ عادت پر خون آیا  تو یہ سارےدن حیض کے  ہوں گے،اس لئے اگر ان دنوں میں روزہ رکھا ہے،تو اس کی قضا ضروری ہوگی۔اور اگر عادت تک خون نہیں آیا ،لیکن دسویں دن سے پہلے دوبارہ خون آنا شروع ہوا۔تو پھر وہی تفصیل ہے جو جواب  میں گزرا ہے ،کہ اس صورت میں آپ کی سابقہ عادت برقرار ہے،لہذا عادت کے بعد جو نمازیں یا روزے چھوڑ دی ہونگی ،انکی قضاء لازم ہوگی،اور اگر دس دن سے پہلے خون رکا،تو پھر عادت تبدیل ہوگئی ہے،لہذا ان دنوں میں چھوڑی گئی نمازوں کی قضاء نہیں البتہ اگر رمضان کے روزے چھوڑے ہیں،تو ان کی قضاء ضروری ہوگی۔
في سنن الدارقطني:حدثنا سعيد بن محمد حدثنا أبو هشام حدثني عبد العزيز بن أبي عثمان الرازي عن سفيان : قال أقل الحيض ثلاث وأكثره عشر(كتاب الحيض: 1/ 210:دارالمعرفة)
في الدر المختار: ( ويحل وطؤها إذا انقطع حيضها لأكثره ) بلا غسل وجوبا بل ندبا  ( وإن ) انقطع لدون أقله تتوضأ وتصلي في آخر الوقت وإن ( لأقله ) فإن لدون عادتها لم يحل وتغتسل وتصلي وتصوم احتياطا وإن لعادتها فإن كتابية حل في الحال وإلا ( لا ) يحل ( حتى تغتسل ) أو تتيمم بشرطه. ( أو يمضي عليها زمن يسع الغسل ) ولبس الثياب ( والتحريمة ) يعني من آخر وقت الصلاة لتعليلهم بوجوبها في ذمته(باب الحيض: 1/ 294:ط:دارالفكر)
في الفتاوى الهندية:الطهر المتخلل بين الدمين والدماء في مدة الحيض يكون حيضار ولو خرج أحد الدمين عن مدة الحيض بأن رأت يوما دما وتسعة طهرا ويوما دما مثلا لا يكون حيضا لأن الدم الأخير لم يوجد في مدة الحيض(الفصل الأول في الحيض: 1/ 36:دارالفكر)

واللہ اعلم بالصواب

تاریخ اشاعت: 20 Jun 2026