واضح رہے کہ اگرکسی آدمی کا طوافِ زیارت رہ جائے،اور اس کے بعد وہ طوافِ وداع یا کوئی اور نفلی طواف بھی نہ کرے،تو وہ اس وقت  تک  محر م رہے گا(یعنی بیوی کےساتھ مباشرت جائز نہ ہوگی) جب تک کہ طوافِ زیارت کا اعادہ نہ کرے،اورطواف میں تاخیر کی وجہ سے اس پر ایک دم بھی لازم ہوگا۔البتہ اگر وہ ایامِ نحر ہی میں  طوافِ وداع یااورکوئی نفلی طواف ادا کرے،تو یہ طوافِ زیارت کا بدل بن جائےگا،اورطواف ِ وداع کے چھوٹ جانے کی وجہ سے ایک دم لازم آئے گا،لیکن  اگروہ  ایام ِ نحر کے بعد طواف ادا کرے،تو اس صورت میں بھی طوافِ وداع،طوافِ زیارت کا بدل بن جائےگا،لیکن اس صورت میں دو دم لازم آئینگے،ایک توطواف زیارت میں تاخیر کی وجہ سےجبکہ دوسرا  طوافِ وداع چھوڑنے کی وجہ سے،البتہ چونکہ طوافِ وداع کسی وقت کے ساتھ خاص نہیں ،اس لئے اگر بعد میں بھی کبھی اس کو ادا کیا،تو دوسرا دم ساقط ہوجائےگا۔
بصورتِ مسئولہ چونکہ شخص ِ مذکورنے طوافِ وداع ادا کیا تھا،اس لئے وہ طوافِ زیارت کا بدل بن گیا تھا،اس لئے اس کےلئے بیوی  حلال ہوگئی تھی،لہذا اس میں کوئی پریشانی کی بات نہیں ،پھر اگر اس نے طوافِ وداع ایامِ نحر ہی میں ادا کیا تھا،تو چونکہ وہ طوافِ زیارت کا بدل بن گیا تھا،اس لئےاس  پرطوافِ وداع چھوڑنے کی وجہ سے ایک دم  لازم ہوگا،لیکن اگر شخص ِ مذکورہ عمرے کے سفر میں طواف ِ وداع کا اعادہ کرےگا،تو اس سے دم ساقط ہوجائےگا،کیونکہ طوافِ وداع کےلئے کوئی خاص وقت مقرر نہیں۔لیکن اگر اس نےطوافِ وداع  ایامِ نحر کے بعد  ادا کیا ہو،تو اس صورت میں دو دم لازم ہونگے،ایک  طوافِ زیارت کو ایامِ نحرسے موخرکرنے کی وجہ سے ،اور دوسرا طوافِ وداع چھوڑنے کی وجہ سے ،لیکن اس صورت میں بھی اگر وہ طواف وداع عمرے کے سفر میں ادا کرےگا،تو یہ دوسرا دم ساقط ہوجائےگا۔مذکورہ بالا تمام مسائل میں دم سے مراد چھوٹا دم ہے،نہ کہ بڑا۔
نوٹ:چونکہ مذکورہ بالا عبارت میں   آپ کا اصل سوال حل  ہوگیا،اس لئے  باقی ماندہ سوالات کے جوابات کی ضرورت نہیں ۔
في الفتاوى الهندية :وإن ترك كلا الطوافين فهو حرام على النساء أبدا وعليه أن يرجع ويطوف طواف الزيارة وطواف الصدر وعليه دم لتأخير طواف الزيارة في قول أبي حنيفة رحمه الله تعالى ولا شيء عليه لتأخير طواف الصدر لأنه غير مؤقت وإذا ترك طواف الزيارة خاصة وطاف طواف الصدر فطواف الصدر يكون للزيارة وعليه لتركه طواف الصدر دم(الفصل في الطواف والسعي: 1/ 246:دارالفكر)
وفي الهداية:لولم يطف طواف الزيارة أصلا حتى رجع إلى أهله فعليه أن يعود بذلك الإحرام ،لإنعدام التحلل منه وهومحرم عن النساء أبدا حتى يطوف.(كتاب الجنايات:1/295:ط:مكتبة الحسن)

واللہ اعلم بالصواب

تاریخ اشاعت: 20 Jun 2026