کیا حکم ہے شریعتِ محمدی ﷺ بابتِ بذیل:- فریقِ اول: (فریقِ سوئم کے دیور اور بھتیجے، اور سگے چچا اور چچا زاد بھائی) فریقِ دوئم: (فریقِ سوئم کے سگے بھائی اور ماموں اور 15 سال سے مفت بلا معاوضہ کفیل) فریقِ سوئم: (بیوہ والدہ اور دو یتیم بیٹیاں) مندرجہ بالا تینوں فریق وراثت، میراث اور دو یتیم بچیوں کے رشتوں کے حصول پر کئی دفعہ لڑائی جھگڑے اور مقامی سطح پر شریعت جرگہ منعقد ہوتا رہا۔ آخری بار کے جھگڑے میں فریقِ اول کا ایک شخص (فریقِ سوئم کا دیور/چچا) زخمی ہوا۔ مابعد ثالثی برادری کے تحت ایک معاہدہ عمل میں آیا۔ یہ کہ معاہدہ کل 16 شقوں پر مبنی ہے اور اس معاہدہ کے تحت وراثت کی تقسیم وراثت کی معافی یا دست برداری، میراث کا حصول یا دست برداری لڑائی جھگڑا کے بابت معافی یا جرم ازالہ کے علاوہ دو یتیم بچیوں کی رہائش اور شادیاں بھی شامل ہیں۔ اس معاہدہ کے ابتدائیہ میں/تمہید میں فریقِ دوئم فریقِ سوئم کی تینوں خواتین کا حلفاً طلاقاً ضامن ہے کہ فریقِ سوئم معاہدہ پر عمل درآمد کرے گا اس معاہدہ کی شق نمبر 02 جو دو حصوں پر مشتمل ہے۔ شق:- یہ کہ صلاح الدین (مرحوم) کی یتیم بچیاں اپنی مرضی/رضامندی سے شادی کریں گی۔ تاہم رشتے فائنل کرتے وقت ڈاکٹر عبدالمنان و ماسٹر گل فیروز موجود رہیں گے اور مذکورین لازمی رشتہ دار بزرگوں کو شاملِ فیصلہ رکھیں گے۔ یہ شق 02 حصوں پر مشتمل ہے ایک حصہ دونوں یتیم بچیوں کو تابعِ قانون، مطابقِ شریعت آزادانہ شادیاں کرنے کے حق پر مشتمل ہے۔ جبکہ دوسرا حصہ جس میں تینوں فریقین نے دو ثالث مقرر کر رکھے ہیں کہ ان یتیم بچیوں کے رشتے طے ہوتے وقت لازمی رشتہ دار بزرگوں کو شاملِ فیصلہ رکھیں گے۔ اب فریقِ سوئم کی دو یتیم بچیوں میں سے ایک نے کوئی رشتہ قبول کر لیا اور نکاح کر لیا تاہم رخصتی پذیر ہونا باقی ہے۔ جبکہ ثالثین نے فریقِ اول کے اہم ترین شخص اور فریقِ دوئم کے اہم ترین شخص سے اس بابت پوچھا فریقِ اول کے اہم ترین شخص حقیقی چچا نے گواہان کی موجودگی میں عدم دلچسپی، لاتعلقی اور بیزاری کا اظہار کرتے ہوئے شاملِ فیصلہ ہونے سے انکار کیا جبکہ فریقِ دوئم کے اہم ترین شخص حقیقی ماموں اور بلا معاوضہ کفیل عرصہ 15 سال نے بچیوں کو آزادانہ اور مختارانہ فیصلے کا حق دیا اپنی رائے ٹھونسنے سے صریحاً اجتناب کیا۔ ان حالات میں ثالثین نے بچی کو منگنی نکاح کی اجازت دی اور اس نے کر لی۔ اب فریقِ اول اور کچھ غیر ضروری، غیر متعلقہ لوگوں نے اسے معاہدہ کی خلاف ورزی قرار دے کر فریقِ دوئم پر حلف اور طلاق واقع ہونے کا شور شرابہ کھڑا کر دیا۔ جبکہ فریقِ سوئم کی دونوں یتیم بچیاں شق نمبر 02 کے حصہ اول کے مطابق آزادانہ اپنی مرضی منشاء سے شادی کرنے میں آزاد و خود مختار ہیں جبکہ ان پر براہِ راست کوئی قدغن مقرر نہ ہے البتہ دو ثالثین رشتہ داروں کو پوچھنے کے ذمہ دار ہیں اور انہوں نے بھی اپنی ذمہ داری نبھائی پھر فریقِ سوئم نے کیسے معاہدہ کی شق نمبر 02 کی خلاف ورزی کی اور کیسے فریقِ دوئم سے فریقِ سوئم کے ضامن پر حلف و طلاق واجب ہوتی ہے؟